дээд сургуулийн үндсэн ангийг дүүргэсэн. Энэ удаад уншигчиддаа уран бүтээлийн "Бүүвэй" богино өгүүллэгийн номоо өргөн барьж байна. Энэхүү номоо МҮОНТ үүсч байгуулагдсаны түүхт 50 жилийн ойд зориулав.

                                                                            Бүүвэй

Одоогоос хэдэн жилийн өмнө би Германд ажиллаж амьдрдаг дүүгийнхээ урилгаар Кёлын хот дахь гэрт нь зочиллоо. Энэ тэрийг сонирхон, юм үзэж, эхэндээ сайхан байсан ч сар гаран болохын алдад уйдах янзтай. Нэг өдөр дүүдээ: " -Энэ улс орны чинь амьдралыг гаднаас нь хэн ч харчихна. Юм бичдэг хүн байна даа, эгч нь айл гэр, хүн зоны нь амьдралтай танилцья" гэж үглэсээр байж, хүүхэд асрах ажилд орлоо дд.
Төрөөд хоёр сар гаран болж байгаа нялх амьтныг Маркус, аав ээжийн нь шоглон хэлснээр "аашт" гэх таван настай хүүг Макс гэнэ. Хоёр хүү тусдаа нэг, нэг том өрөөнд байх нь миний гайхшийг төрүүлэв.
Элдэв тоглоом, энэ тэр юм унжуулсан хөөрхөн модон дотор хөмсөг, сэвлэг гэхээр юмгүй мулзан шар амьтан унтана...  Урт шар сормуус нь үл мэдэг чичигнэн, шилээ шөргөөх аядсанаа сэрж буй болтой мурчигнан, улаан буйл гаргаж жигтэй чангаар бахирлаа. Би сандарч хүүг өвөр дээрээ авахдаа эрхгүй сэвлэгийг нь үнэрлээдэхвэл монгол хүүхдийн зулайнаас сэнхийдэг энхэр хөөрхөн үнэр бус, содон сонин савагийн үнэр хамар цоргив.
Би "Өө хөөрхөс" хэмээн харамсангуй дуу алдаад бүлээсгэж тавьсан угжтай сүүг нь өглөө. Хүү цадаагүй юм уу, ер ийм уйланхай юмсан уу бахирсаар л байлаа. Нарийн цаг минутаар хооллодог болохоор нэмж өгөх аргагүй... Хоосон шил соруулж гэдсийг нь дүүргэлтэй биш, дэмий л бүүвэй аялан өрөөн дотуур хэсэг алхав. Хүүгийн нүд анилдан онилдон байснаа унтсан хэдий ч удсангүй сэрээд дахиад л бахирч гарлаа.